KANOWIT, 26 Ogos: Opis Betanam Betupi Sarawak chukup komited ngemujurka juluk perintah ti deka nempa pelilih Kanowit nyadi pengeluar besai buah dabai di wilayah tu dudi hari.
Penulung Direktor Kanan Unit Pemansang Opis Betanam Betupi Sarawak Peter Jarit madah, raban sida udah ngatur siri kus betuju ngerembaika penemu pasal teknologi baru dikena nanam dabai di Kanowit.
“Tuju kami ngatur kus tu iya nya dikena kami ngiri penemu pasal teknologi ke baru awak ungkup sida di sitak Ngemah ditu laban tu udah selalu disebutka bala menteri deka ngadaka siti endur alai nanam dabai dikumbai kitai Ladang Dabai,” ku iya maya dirandau TVS, empai lama.
Ku iya, arapka bisi ejensi bukai nyengkaum pengari rayat di Kanowit besaup ngamatka juluk nempa Kanowit nyadi pengeluar buah dabai di wilayah tu.
Tandu iya, bala penyereta kus dikearapka ulih nguna penemu ke udah dipelajar sida nyadi tauke dabai dudi hari.
Dulu ari nya, bisi 49 iku raban komuniti China enggau Iban ari Kanowit nyereta Kus Diseminasi Teknologi Nanam Dabai.
Kus nya diatur nengah Kerejasama Indu Opis Betanam Betupi Kanowit pengelama dua hari berunggu kena 22 enggau 23 Ogos tu tadi bepalan ba Dewan Nanga Ngemah Kanowit.-TVS
