KAPIT, 26 Ogos: Jalai alternatif deka dibuka berindik ari Jalai ba Sempili Baleh runtuh tumu pagi tadi.
Kaban Kunsil Nengeri (ADUN) Baleh Nicholas Kudi Jantai madah, penyadi tanah tusur ba Jalai Sempili nya udah dikerandau enggau raban ari Opis Kereja Raya (JKR) Kapit lalu sida deka mutarka pekara nya enggau naka pengelengkas .
“Raban ari Opis Kereja Raya (JKR) Kapit udah meresa endur nya lalu ngaga pemutus deka ngaduka jalai baru.
“Aku mega minta raban JKR meresa jalai bukai ba pelilih Kapit ke dipeda bisi potensyel deka runtuh,” ku iya lebuh ditelefon pemberita TVS.
Berebak enggau nya Nicholas Kudi madahka bisi sebuah kerita labuh bekau ari penyadi tanah tusur nya tumu pagi tadi tang nasit nadai penusah bebadi empas ari insiden nya.
Jalai Sempili Baleh endang siti jalai akses ngelawa Tekat Baleh diripotka runtuh tumu pagi Hari Satu dipelaba ketegal ujan bangat. – TVS
