BETONG, 26 Ogos: Bisi 320 penyereta udah ngenuku diri masuk Pekit Ensikal Layar (LCC) Edisyen Ke-6 2024 ti deka diatur berengkah 30 haribulan 8 nyentuk 1 haribulan 9 tu.
Chairman Pengatur LCC, Morris Nayup madah penyampau nya chukup positif enti dibandingka enggau sebedau tu ke bisi 279 iku penyereta.
“Kitai berasai temegah enggau beterima kasih laban udah nerima mayuh amat penyereta masuk pekit.
“Penyereta taun nyin kemari semina 279 iku tang serak tu kitai udah nerima 320 penyereta lalu penyereta serak tu ukai semina penyereta ke kala enggau sebedau tu tang bisi mega baru.
“Kitai udah ngerintaika Terengganu TSG Academic, kitai mega bisi Anak Brunei Cycling Team enggau mega RPM Team ari Indonesia,” ku iya.
Iya mansutka penerang nya maya ngemataka Pekit Angkat Berat SUKMA Sarawak 2024 di Betong, empai lama.
Ku iya, antara tim tegar ke udah ngenuku diri masuk pekit tu iya nya TSG Cycling Team ari Terengganu, Anak Brunei Cycling Team enggau RPM Team ari Indonesia.
Tandu iya mayuh aktiviti bukai bisi diatur maya nya ila baka Panggau Pemerindang, E-Lumba, Fun Ride, Pickleball enggau Tennis.
Kelimpah ari nya, pengerami tu ila deka dirichahka penanyi tebilang menua Baby Shima enggau sekeda artis tebilang lokal.-TVS