DEBAK, 25 Ogos: Sarawak netapka taga deka ulih nyapai 84 midul emas ungkup lumba Para SUKMA 2024 ti deka diatur di Kuching berengkah 22 nyentuk 28 September tu.
Tuai Kontinjen Para SUKMA Sarawak 2024, Datuk Mohammad Razi Sitam madahka, taga besai kontinjen tuai rumah iya nya deka ngambi pulai gelar champion ari nengeri Sabah ba edisyen 2022.
“Saran kitai keterubah iya nya deka ngambi pulai gelar champion ba taun 2022.
“Kitai alah ngagai Sabah kurang empat emas maya nya.
“Kitai 50 (emas) Sabah 54 midul (emas) lalu serak tu bepelasarka fokus kitai nyaran (bulih) 83 emas ungkup Sarawak,” ku iya.
Iya ke mega Sapit Menteri Pemansang Orang Indu, Nembiak Mit Enggau Pengelantang Komuniti Sarawak madah munyi nya pengudah Bejadika Kus Nyaga Pemun Orang Lunggar Umur (KPAWE) Siri Satu 2024 di Diwan Millenea Debak kemari.
Ku iya, raban sida andal saran nya ulih dijapai bepelasarka gaya engagu tikas pemujur semua raban atlit Para SUKMA Sarawak 2024 diatu.
Bisi 750 pegawai enggau 1528 iku atlit deka besemekih ba lumba Para SUKMA Sarawak 2024.
Antara achara lumba para ti dipekitka iya nya para nyemerai, para nimbak laja, para olahraga, para badminton, para ping pong, para tenpin bowling, boccia, para lawn ball, para angkat berat enggau para chatur.-TVS
