DEBAK, 25 Ogos: Pengawa ngatur Kus Nyaga Pemun Orang Lunggar Umur (KPAWE) atur beguna dipejalaika Perintah Sarawak dikena nyikap nyadi status nengeri gayu manggai taun 2028.
Sapit Menteri Pemansang Indu, Anak Mit enggau Pengelantang Komuniti Sarawak Datuk Mohammad Razi Sitam madah, pengawa ngatur kus dibaruh Langgur Pemansang Malaysia Lumpar Ke-12 (RMK12) nya betuju meri penyedar bekaul enggau penyadi gayu sereta ngelatih raban ngintu orang tuai enggau profesional.
“Perintah Sarawak nengah Opis Menteri Pemansang Indu, Anak Mit enggau Pengelantang Komuniti bebendar nyikap Sarawak napi status nengeri gayu 2028.
“Nya alai kus tu siti ari inisiatif ke beguna lebih agi dikena narak komuniti bekaul enggau pemesai guna nyaga enggau ngintu pengelantang orang tuai tauka raban ke udah lunggar umur enggau meruan,” ku iya.
Razi ke mega Kaban Kunsil Nengeri (ADUN) Saribas madah munyi nya pengudah bejadika Kus Nyaga Pemun Orang Lunggar Umur Siri Satu 2024 ba ditu, kemari.
Ku iya, kus nya udah dikena kenyau ari taun 2023 asil kerejasama enggau Opis Pengerai Nengeri Sarawak.
Tandu iya, bagi menya KUching udah dipilih nyadi palan keterubah ngatur kus nya taun 20233 kelimpah diatur ba Miri (2023).
Naka tu penyampau sida ke udah ngulu kus tu bisi 47 iku diatur pengelam dua hari iya nya belabuh 24 nyentuk 25 Ogos tu tadi.
Udah tu ila, kus ke sebaka deka diatur di Sibu kena bulan September tu ila.-TVS
