ENGKILILI, 25 Ogos: Bisi 132 iku peranak ari dua buah rumah panjai ba Kampung Merbung ditu tekeruga ketegal penusah ampuh bah ke ngujungka jalai besai ngelawa genturung pendiau nya enda ulih ditengah pengudah ampuh ai penalam lebih kurang lima kaki.
Penusah ke nuntung peranak ba sitak nya nerima perati Kaban Kunsil Nengeri (ADUN) Engkilili Dr Johnical Rayong Ngipa ke bisi datai ngabas rayat ke benung dituntung penusah begulai enggau raban Opis Pengintu Pengelantang Pendiau Raban Bansa (JKM) sereta ejensi ke bekaul sehari tu tadi.
Udah nya, nitihka penerang ari Tuai Balai Bomba enggau Penyah Penusah Sri Aman Penulung Penguasa Bomba (PPgB) Andrew Vengitasamy, naka diatu opis ke bekaul merambu deka muka Palan Pengenduh Sementara (PPS) ungkup guna raban nya nyema gaya penusah nya majak balat.
“Ripot matau jalai besai ari Kampung Merbung ke palan penyadi sepanjai satu kilometer enda ulih ditengah kerita laban ampuh ai penalam tiga nyentuk lima kaki.
“Nya meri pemar ungkup pejalai kerita enggau ba sitak nya mega bisi 35 buah rumah enggau anggar raban tasah bisi 132 iku lalu dalam perambu deka muka PPS ba timpuh ke semak,” ku iya maya dirandau TVS sehari tu tadi.
Berindik ari nya, iya bisi ngelalau peranak ke besemak enggau kandang endur nya seruran bejejaga dikena nyeliahka sebarang penusah ke enda disadang nyadi.
Tandu iya, peranak ba endur ke berisiko ulih kena penusah ampuh bah patut seruran ngadang enggau ubah tikas ai ba kandang endur diri .
Ba awak ke sama, peranak mega dilalau terus meri kerejasama enggau ejensi ke bekaul nyema dipinta mindah ngagai palan pengenduh sementara.
Iya nerang, pengawa matau deka chakah dipejalai ba endur berisiko ampuh bah ngelingi Kampung Merbung.-TVS
