SPAOH, 24 Ogos: Pengawa nyadi tuai rumah Lumba Malaysia (SUKMA) ke-21 ukai semina meri jereki ke belimpah ngagai bala pemekuh industri mit enggau jelan pemesai (PKS) tang mega meri penguntung ngagai raban tauke tauka pengempu kerita enggau van suwa.
Ba Betong siku pengempu van suwa, Walter Chang, 45 taun madah diri untung ke diulih iya sekumbang SUKMA tu tadi endang mayuh agi ari selama.
“Ba aku laban ke nyadi deriba van tu mih peluang kami ngulihka penatai pemisi,” ku iya maya dirandau pemberita ba Palan Achara Angkat Berat di Betong, kemari.
Udah nya, ba penemu Wan Mohamad Taha Wan Pakeh, 57 taun, iya chukup beterima kasih ngagai perintah laban enda ninggalka servis pengempu van suwa baka iya dikena nambahka penatai pemisi sekumbang ngatur achara angkat berat di Betong.
“Terima kasih ungkup SUKMA taun tu laban udah meri peluang ngagai kami ke bisi van suwa ngulihka jereki tambah,” ku iya.
Tandu iya, ari perati SUKMA serak tu udah mujur nyungkak sosioekonomi industri bukai baka PKS enggau sektor hotel.
“SUKMA tu dipeda mujur nyungkak ekonomi bala pedagang baka hotel enggau kedai, bansal-bansal enggau restauran laban udah sama bulih pemaik ari lumba tu.
“Terima kasih besai mega ngagai Perintah Sarawak,” ku iya.
Bepelasarka rikod bisi 20 iku pengempu kerita enggau van suwa bisi ngambi bagi ba pengawa nganjung balat atlit enggau pegawai kontinjen sekumbang SUKMA ba Betong.
SUKMA Ke-21 tembu lemai tu tadi ngemataka kontinjen Sarawak mujur nyadi champion penuh pengudah tegumpulka 200 iti midul mungkur 76 midul emas, 54 (pirak) enggau 70 (engkeraju).-TVS
