TOKYO, 24 Ogos: Biau balai pemadu balat dipelaba deka mangka semak kandang menua barat enggau timur Jipun kena Hari Dua enggau Hari Tiga minggu baru.
Menijar Kerita Api Laju Shinkansen meri tangkan pasal nyangka bisi penanggul servis ba mayuh endur dikena sida nesau mensia mayuh ngambika sama ngadang.
Ku penerang ari Ejensi Meteorologi Jipun, Biau Balai Shanshan dipelaba rarat ke utara nuju ke Tebing Tasik Pasifik Jipun enggau peneras angin betambah ketegal temparicha tasik ke tinggi, taja pan arung ke dipansa biau balai nya tusah deka disangka.
Naka pukul 9 pagi Hari Enam, biau balai nya benung bepusin ba kandang Pulau Ogasawara, Selatan Tokyo lalu benung rarat nuju ke adap utara enggau peneras angin 25 kilometer sejam.
Ejensi nya mega meri tangkan pasal kilat, ribut kudi, ujan batu ke balat sepanjai ujung minggu sebedau penatai kudi tropika nya.
Ujan bangat deka suah nyadi ba Tokyo enggau kandang endur ke besemak seminggu dua tu, ngujungka penusah ampuh bah sereta ngeruga servis kerita api.
Ku tandu menijar ejensi nya mega, enti biau balai nya udah datai, servis kerita api laju Shinkansen Tokaido, Sanyo, Joetsu enggau Hokuriku nyangka deka dikinsil tauka diketu sementara ba sekeda endur tauka ba semua menasan kena Hari Dua enggau Hari Tiga tu ila.-TVS
