SRI AMAN, 19 Ogos: Bala ‘kaki sabung’ bekesebar lari pengudah dilawa raban polis ba sebuah kelang di ladang sawit, Jalai Ulu Skrang ditu, kena Hari Minggu tu tadi.
Tuai Polis Pelilih Sri Aman, DSP Mathew Manggie madah, nitihka penerang ari Opis Tasat Pengawa Salah (JSJ), Indu Opis Polis Pelilih (IPD)Sri Aman pengawa datai ngenyit nya dipejalaika urung pukul 3.30 lemai.
“Pengudah panjung polis didinga sida lalu sedarka penatai polis, seraban lelaki ke bisi di kelang sabung nya terus lari.
“Raban polis mujur nangkap enam iku seraya sida ke bukai terus ngelarika diri ngagai kampung,” ku iya nengah sebengkah penerang.
Ku iya madah, semua saspek lelaki ke ditangkap iya nya tiga iku besai tuai beumur 61, 64 enggau 69 taun lalu tiga iku saspek ke bukai beumur 25, 27 enggau 52 taun.
“Sama bisi dirampas iya nya tiga iku manuk idup, siku manuk mati, siti dachin, siti papan entaruh, siti kerusi plastik, siti mija plastik enggau dua bilah taji manuk.
“Semua sida ke ditangkap nya ngaku diri bisi kaul enggau aktiviti nyabung manuk nya,” ku iya.
Tandu iya, kes nya dipansik nitihka Seksyen 3(1) Langkah-langkah Pencegahan dan Penganiayaan Terhadap Binatang 1962. – TVS