BETONG, 18 Ogos: Sapit Premier Sarawak Datuk Amar Douglas Uggah Embas madahka diri asa enggau ulah sekeda raban ke nguji bekelikuhka penerang dipansutka iya taun nyin kemari bekaul enggau penyampau projek sakit di Sarawak ba media rama.
Ku iya, ulah baka nya enda patut nyadi ba dunya ke udah ngalih ngagai jeman teknologi pemintar tempa (AI) kemaya hari tu.
“Diatu kitai udah ngalih ngagai digital ekonomi lalu media rama bejalaika pengawa berat.
“Nyadi aku ngelalau semua kaban parti ngemeratka pekara ke bisi nyadi ba renggat baruh laban nya ulih mantaika sekeda isu chunto baka ke dikemegau apin lama.
“Aku diripotka dikumbai mantaika penerang madahka bisi 340 projek sakit enggau 36 ba status raya di selampur Sarawak kebendar nya enda betul laban penyampau ke amat kebendar enda datai 100.
“Projek sakit ba selampur Sarawak jam diatu ngena polisi mantau intensif.
“Diatu semina tinggal dua tauka tiga iti aja projek sakit di Sarawak,” ku iya.
Uggah ke mega Kaban Kunsil Nengeri Bukit Saban mansutka jaku nya maya meri timbal bekaul enggau isu begau ba media rama pasal penyampau projek sakit ba Sarawak, sepengudah ngulu sebengkah program ditu, kemari.
Ku iya, ungkup tuju nya Perintah Sarawak deka bejalaika polisi ‘One Month Role’ baka ke udah dipadahka Premier Sarawak Datuk Patinggi Tan Sri Abang Johari Tun Openg empai lama.-TVS
