KUCHING, 18 Ogos: Pengawa ngatur Lumba Malaysia (SUKMA) ti nyadi lumba pemadu besai di menua tu, ulih nanggam enggau ngerapitka kaul entara nengeri sereta nerenakka ulah ti positif ba raban rebak baru.
Premier Sarawak, Datuk Patinggi Tan Sri Abang Johari Tun Openg madahka , lumba enggau main nya ukai semina alai bepekit enggau deka menang aja tang kebendar iya dikena ngenegapka penyerakup.
“Taja pan keterubah iya ukai giliran sarawak, tang dalam semengat penyerakup Malaysia enggau pemansang lumba enggau main sereta raban nembiak Sarawak sanggup nyadi tuai rumah.
“SUKMA nerenakka semengat patriotisma enggau temegahka menua nengah penyereta mayuh bengkah nengeri enggau pupu bansa dalam siti pelasar.
“Tu ulih mantu ngerapitka kaul entara peranak malaysia ti datai ari mayuh macham asal penatai,” ku iya.
Iya madah munyi nya lebuh bejaku ba rambau Pengerami Bejadika SUKMA Sarawak ke-21 2024 di Stadium Sarawak, ti dikemujurka Tuai Pemegai Menua Nengeri Sarawak, Tun Pehin Sri Dr Wan Junaidi Tuanku Jaafar, malam tadi.
Tandu Abang Johari, Nengeri Sarawak amat temegah ati nyadi tuai rumah SUKMA edisyen ke-21 sekali tu.
“Nya kebuah, di Sarawak tu, aku milih endur pekit ti deka diatur ba bagi menua bukai dikena meri peneleba ngagai raban nembiak kitai enggau penyelai budaya enggau etnik di Sarawak,” ku iya.
Berindik enggau nya, tu kali ketiga Sarawak udah ngatur Lumba Malaysia (SUKMA) nya pengudah kepenudi ba taun 2016.
Keterubah iya, SUKMA 2024 deka diatur ba semilan bagi menua di serata Sarawak, ngaul 488 achara dalam 37 bengkah lumba enggau main.-TVS
