MIRI, 18 Ogos: Siku lelaki beumur 22 taun bakal pengudah tong gis ke dikena iya nyumai angus ba sebengkah penusah ke nyadi di sebuah Cafeteria Sepital Miri ditu pagi tadi.
Komander Operasyen, PBK II KUP Garvin Maya John madahka, raban sida nerima ripot bekaul enggau kes nya urung pukul 8.57 pagi lalu nganjung enam iku raban Balai Bomba enggau Penyah Penusah (BBP) Lopeng ngesah palan penusah nyadi.
“Penusah angus nya ngaul tong gis nyumai lalu mujur dipadamka bakih kereja iya sebedau raban bomba datai.
“Raban bomba semina matau ba palan nya dikena nentuka palan nya udah likun,” ku iya nengah siti penerang sehari tu tadi.
Ku iya madah, tudah ke bakal nya udah dibai bakih ke sama kereja enggau iya ngagai sepital ngambika diperubat. – TVS
