BETONG, 18 Ogos: Komiti Nembiak Parti Pesaka Bumiputera Bersatu (PBB) Pampang Bukit Saban diperansang terus negapka kerejasama sereta bebendar agi matak penyereta rebak baru masuk parti nya.
Sekretari PBB Pampang Bukit Saban Dr Richard Rapu madah, genap pampang mit PBB ba renggat baruh patut pintar sereta seruran ngelanggur aktiviti enggau program ti meri pemaik ngagai parti.
“Kitai pampang mit tu jalai kitai ulih narit ati lebih agi bala nembiak awak ke sida iya nemu reti nama tuju kitai beparti nama juluk kitai ba parti.
“Nya alai, kitai mesti naka iya ulih sama ngansak bala nembiak kitai awak ke sida nemu reti tauka juluk parti lalu sama mai sida iya masuk sereta ngeringka parti kitai ba renggat baruh,” ku iya.
Dr Richard ke mega Kaban Parlimen Betong madah munyi nya maya Pengawa Randau Nembiak PBB N. 37 Bukit Saban ba Rumah Panjai Kelimbang Jaman, Penyulok Ulu Layar kemari.
Udah nya, ku Dr Richard laban ke udah nyadi kaban parti sida patut gaga ati dalam bejalaika pengawa dalam parti laban PBB nyadi parti ke pemadu besai sereta nyadi tulang belakang perintah di wilayah tu dibaruh iring Premier Sarawak Datuk Patinggi Tan Sri Abang Johari Tun Openg ke nyadi Presiden PBB.
Ku iya, komiti Nembiak PBB lebih agi di Bukit Saban ke disaran patut lebih regas ngatur program ngaul parti.
Ke penerang, PBB Bukit Saban kebendar bisi 17 buah pampang mit lalu 13 ari nya ditumbuhka ba rumah-rumah panjai enggau empat buah agi diberi ngagai pengani Kampung Melayu di Pasar Spaoh.-TVS
