BETONG, 18 Ogos: Urung 80 iku raban Tim Penyukung Komuniti Kampung Melayu Betong deka datai meri sukung ngagai atlit angkat berat seraya ngerichahka agi Pekit Lumba Malaysia (SUKMA) Sarawak 2024 ti deka berengkah pagila (19 Ogos) nyentuk 23 Ogos tu.
Tuai tim nya, Abang Jamadilhir Abang Mostafa madah, iya chukup andal ulih mai sida ngagai menalan pekit angkat berat nya dikena meri peransang ngagai bala atlit ke bepekit di Diwan Lumba Tan Sri Datuk Amar Stephen Kalong Ningkan ditu.
“Urung 80 iku sida ari Kampung Melayu Betong deka datai meri sukung ngagai tim angkat berat Sarawak.
“Kami deka meda pekit tu richah laban penatai bala penyukung seraya meri peransang ngagai atlit kitai (Sarawak) ngambika sida tau bulih midul emas,” ku iya maya dirandau TVS empai lama ke udah.
Ku iya, nengah sukung ari bala sida mega dikearapka tau meri empas positif ngagai pemutus ke dijapai bala atlit.
Ke penerang bisi 16 kategori sereta 48 midul deka diperebutka bala atlit ba pekit angkat berat SUKMA Sarawak 2024 ngaul 215 atlit enggau pegawai ari 13 buah kontinjen.-TVS
