KUCHING, 18 Ogos: Indonesia ngembuan juluk ati deka nempa kerejasama enggau Sarawak dalam nyungkak ekonomi di Borneo sepengudah pengawa bejadika indu menua Nusantara (IKN) di Kalimantan kemari.
Konsul Jenderal Republik Indonesia Kuching, Raden Sigit Witjaksono madahka, nengah nguna manah penuduk palan administrsyen baru Indonesia enggau Sarawak, potensyel kerejasama dalam mayuh bengkah sukut amat dikelaluka ungkup jemah ila.
Ku iya madah, nengah kerejasama enggau negutka kaul ti rat nya dipechaya ulih meri pemaik ngagai semua raban kelebih agi Sabah enggau Sarawak sereta Brunei Darussalam ari sukut dagang enggau ekonomi lokal.
“Kitai mega ngarapka enggau penumbuh indu menua baru, indu menua Nusantara di kalimantan timur, tu deka mekuhka sereta ngenegapka kerejasama Indonesia enggau Sarawak.
“Sarawak deka nyadi menua sepiak ti semak, menua sepiak, iya bisi ditu. ketegal ke semak, kitai bisi sempadan pemanjai lebih 2,000 kilometer. Siti ari nya bisi dia,Sebaru enggau Kalimantan Barat, bisi mimit ba tengah nya, Kalimantan Timur Tengah, atas Kalimantan Utara,” ku iya.
Iya madah munyi nya lebuh ditemu pemberita sepengudah Pengerami Ngintu Hari Merdeka Ke-79 Republik Indonesia di Opis Konsulat Jenderal Republik Indonesia Kuching ditu kemari.
Tandu iya, pengelebih Sarawak dalam kuasa gadung mega dikearap ulih mantu nyungkak pemansang Kalimantan.
Sebedau tu Sarawak Energy Berhad udah meranakka puku ba Tekat Ai Malinau di Kalimantan enggau pemegai saham 25 peratus ungkup pemansang hidroelektrik.
“Enggau pemindah indu menua tu, kami ngarapka semua kerejasama ti udah dipejalaika kami nyentuk ke diatu, agi ulih dikemanahka, kitai bela ulih bekerejasama dalam semua bidang.
“Ambikka chunto iya nya dalam bidang kuasa, laban kitai nemu Sarawak maju dalam bidang kuasa,” ku iya.-TVS
