AUSTRALIA, 16 Ogos: Perintah Sarawak nengah Opis Kampung Sarawak nempa kerejasama enggau University of The Sunshine Coast, Australia (UNISC) dikena ngerembaika pengelandik ba pengawa pansik.
Komited kerejasama nya dipandangka nengah pengawa nyain sempekat sereta Betukar Surat Niat (LoI) entara opis nya tu enggau UNISC ti nyadi kelaie pemun ngagai randau sereta nambahka pemereti ati.
Nitihka penerang ari Opis Sapit Premier Sarawak, Datuk Amar Awang Tengah Ali Hasan kerejasama nya mega mandangka pengawa betukar penerang teknikal, kerejasama pansik enggau bekunsika penemu sereta teknologi nyengkaum ngumpul data, formula berandau senentang analisis, pemansang tauka bejalaika pekara ke bekaul enggau kampung.
Pengawa betukar LoI tu dikemataka Sapit Premier Sarawak Datuk Amar Awang Tengah Ali Hasan empu.
Direktor Opis Kampung Sarawak, Datu Hamden Mohamad udah nyain surat LoI nya ngarika Perintah Sarawak lalu Mandal Chanselor enggau Presiden Profesor Helen Bartlett ngarika UNISC.
Sama bisi diatur maya tu iya nya licha senentang pansik ari empat pengelicha enggau pemansik UNISC sereta Institut Pansik Kampung.
Entara pejuluk ke bisi dikerandauka iya nya nyengkaum pengawa ngadaka purih enggau silvikultur dikena nambahka produktiviti enggau nilai ladang sereta pengawa ngatur jelu pengerusak ba Kampung Ladang Borneo.-TVS
