BETONG, 12 Ogos: Raban ke udah bisi lisin deriba asil ari Program Bantu Lisin Deriba B2 MyLisin dikearap ulih nyadi penguna ke mereti maya deriba ba jalai raya.
Sapit Menteri Pengangkut Malaysia Datuk Hasbi Habibollah madah, sid amega dikearapka nyadi mata enggau pending ngagai perintah ngaga ripot ngagai raban Opis Pengangkut Darat (JPJ) nyema bisi tepedaka ulah ngelanggar undang-undang jalai raya ka menua diri empu.
“Enti uih kitai ke baru udah bulih lisin sehari tu patut nyadi mata enggau pending ngagai perintah.
“Sebedau kita bulih lisin kita semina deriba motosikal baka orang bukai tang diatu kita udah bisi penemu.
“Nyadi tentu kita nemu bagi pekara ke salah enggau pekara ke betul lalu ulih gaga ripot bantu perintah nyema bisi tepedaka ulah ngelanggar undang-undang ba jalai raya sereta ngeruga pengelikun orang bukai,” ku iya.
Iya mansutka jaku nya maya Pengawa Nutup Program Bantu Lisin Deriba B2 MyLisin Tikas Parlimen Betong di Diwan Masyarakat Spaoh, kemari.
Ku iya, taun 2023 bisi 6, 024 kes bebadi nyawa dirikodka ba selampur menua lalu niki sepenyampau 9.46 peratus dibanding taun 2022 ke ngerikod penyampau 5, 671 kes bebadi ba jalai raya.
Tandu iya, ari penyampau nya 4, 489 kes bebadi nyawa ngaul raban ke deriba motosikal.
Di Sarawak, bisi 378 kes bebadi nyawa dirikodka ba taun 2023 lalu ari penyampau nya 198 kes ngaul raban ke deriba motosikal.
Sama bisi datai Kaban Parlimen Betong Betong Dr Richard Rapu sereta ke bukai.-TVS
