ENGKILILI, 12 Ogos: Polisi manah ba bidang pelajar ti nyendiaka pelajar pechuma ungkup anak Sarawak ti belajar ba Palan Pelajar Tinggi (IPT) diempu Perintah Sarawak patut nyadika peransang raban nembiak sekula di nengeri tu.
Kaban Kunsil Nengeri (ADUN) Engkilili Dr Johnical Rayong Ngipa madah, beduduk ari nya rayat di nengeri tu patut beterima kasih enggau pemanah atur ba bidang pelajar ti deka dipejalaika Perintah Gabungan Parti Sarawak (GPS) berengkah taun 2026.
“Pengawa sekula chukup beguna ngagai semua laban ari kitai pandai sekula, kitai ulih nyadi orang ke menyana lalu ulih nulung orang bukai.
“Nya alai,aku meransang bala apai indai mesti nganjung anak sekula lalu beri sukung penuh ngagai pengawa ke diatur sekula sereta PIBG (Gerempung Apai Indai enggau Pengajar),” ku iya.
Iya mansutka penemu nya ba Pengerami Merarau PIBG Sekula Primari (SK) Engkilili No.1 diatur ba sekula nya empu ditu, empai lama.
Ba pengerami nya mega, Dr Johnical bisi nyuaka chek Projek Mit Pemansang Menua Pesisir (MRP) ngagai PIBG SK Engkilili No.1 penyampau RM10,000.
Sama bisi datai iya nya Pegawai Opis Pelajar Pelilih Lubok Antu Vivien Mujah, bala pengajar sereta apai indai nembiak.-TVS
