KUCHING, 11 Ogos: Sepenyampau 7,500 iti tikit dikena ngemataka Pengerami Bejadika Lumba enggau Main Malaysia (SUKMA) Sarawak 2024 deka disadung sechara pechuma kena 12 enggau 13 Ogos tu di Stadium Sarawak.
Mensia mayuh ti deka meda pengerami besai nya di Stadium Sarawak ditu, tau ngambi tikit berengkah ari pukul 10 pagi nyentukka achara nya tembu.
Siku orang semina dikemendarka ngambi empat iti tikit aja lalu tetiap iti tikit nya mesti nyengkaum nama, lumur tingki enggau lumur telefon.
Nungkatka rambai jaku ‘Semangat Perpaduan Membara’, SUKMA Sarawak 2024 deka diatur berengkah ari 17 nyentuk 24 Ogos enggau lebih 400 bengkah achara lumba deka dipekitka.
Pekit SUKMA tu iya nya ti pemadu besai kala diatur, ngaul semilan bagi menua di Sarawak nyadi kelang endur berebutka midul.
SUKMA serak tu deka diatur di Kuching, Samarahan, Serian, Sri Aman, Betong, Sibu, Mukah, Bintulu enggau Miri, nya nyadi saksi ngagai lebih 10,000 iku atlit enggau pegawai ari tetiap nengeri di Malaysia sereta kontinjen ti dikangau ari Brunei.-TVS
