SELANGAU, 11 Ogos: Siku indu bebadi nyawa ba penusah aksiden ti ngaul dua buah entukar ba Jalai Selangau-Tatau ditu, sehari tu tadi.
Tudah ke bebadi nya Dijah Lalei, 65, penumpang kerita Proton Saga, udah disahka madamka seput ba palan penusah nyadi ulih Pemesai Perubat Opis Pengerai Malaysia (KKM).
Komander Operasyen, PBK II Abdul Malik Chi madahka, Balai Bomba enggau Penyah Penusah (BBP) Selangau bisi nerima ripot bekaul enggau kes nya urung pukul 6.29 pagi lalu ngerah lima iku raban bomba ngesah palan penusah nyadi.
“Aksiden nya ngaul = dua buah entukar iya nya sebuah kerita Proton Saga enggau  kerita Mitsubishi Pajero Sport.
“Siku indu tepekul ba dalam Proton Saga seraya mansa lelaki udah mujur pansut kediri,” ku iya ba siti penerang sehari tu tadi.
Tandu iya, raban bomba lengkas bejalaika pengawa ngeluarka tudah ke agi tepekul ngena kereban bomba.
“Udah nya, tudah diserah ngagai raban ambulans KKM ungkup perkara bekaul,” ku iya. -TVS
