KUCHING, 11 Ogos: Pengerami Hari Orang Asal Sedunya 2024 ulih nyadi pantar dikena bejuraika pasal isu besai ke bekaul enggau komuniti.
Pekara nya mega dikeandal ulih ngangkatka tikas pengidup komuniti orang asal nengah atur strategi sereta program ti lebih besemekih.
Premier Sarawak, Datuk Patinggi Tan Sri Abang Johari Tun Openg madahka, pengerami nya dikearap ulih ngasilka resolusyen pemadu manah ke tau dijadika garis lalau ngagai perintah dalam ngelangkar program pemansang ungkup komuniti orang asal.
“Nyerumba pengerami tu, aku pechaya bala pesereta bepeluang berunding baka ti dipadahka presiden tadi enggau bejuraika pasal isu besai bekaul enggau komuniti orang asal baka tanah, pelajar, pengerai, ekonomi, tangkup pengawa tuai, infrastruktur enggau budaya.
“Nyadi, aku ngarap tu deka ulih ngasilka resolusyen ti pemadu manah ulih dijadika garis lalau ngagai perintah dalam ngelangkar program pemansang enggau pengelantang pendiau ungkup komuniti orang asal di selampur malaysia sereta nyangka di menua sepiak,” ku iya.
Iya mansutka jaku nya nengah teks jaku iya ke dibacha Sapit Premier Sarawak, Datuk Amar Douglas Uggah Embas rambau Makai Lemai Budaya Nyerumba Pengerami Hari Orang Asal Sedunya 2024 di Christian Ecumenical Workship Center ditu, kemari.
Iya nerang, Perintah Malaysia udah senaka ulih ngamatka semaya nengah tanggungpengawa dalam nyaga enggau ngetanka hak orang asal.
Tandu iya, kenyau ari suba Perintah Malaysia enda kala nagang sebarang pekara tauka pengawa ngagai orang asal lebih agi ba pengaku dalam mantu nyungkak pemansang menua , ekonomi, rama , budaya, pelajar enggau ke bukai-TVS.
