SARATOK, 10 Ogos: Pemutus perintah deka nambahka penyampau staf teknikal Opis Kereja Raya (JKR) Sarawak endang pemutus ke nemban.
Kaban Kunsil Nengeri (ADUN) Krian Friday Belik madah, penambah nya deka ngujungka genap projek dibaruh ejensi nya ulih bejalaika enggau lebih manah.
“Kitai endang nerima manah perambu deka nambahka staf teknikal ba Opis Kereja Raya Sarawak laban kitai nemu pangku pengawa raban teknikal baka JKR chukup besai.
“Diatu kitai ngembuan semilan sitak pemansang wilayah ba Sarawak lalu semua nya begunaka pengereja pengawa baka staf teknikal, injiniring.
“Nya alai enti kitai bepanggai ngagai pengereja pengawa ke bisi diatu nyangka kitai deka napi penanggul dikena nangkup pengawa ke mayuh dipejalaika ari diatu nyentuk taun 2030,”ku iya.
Iya mansutka timbal nya pengudah tembu Pengawa Nasih Tanah Perambu Projek Ngaga Baru Sekula Primari (SK) Nanga Atoi Saratok, kemari.
Sebedau tu, Sapit Premier Sarawak Datuk Amar Douglas Uggah Embas nengah siti aum pemberita di Kapit madah Perintah Nengeri benung dalam proses ngambi 414 staf teknikal JKR Sarawak.
Ku iya, tuju atur nya dikena mutarka penanggul suntuk raban pengereja pengawa ba selampur Sarawak sereta dikena nentuka semua projek ke udah diperambu enggau benung dipejalaika dibaruh ejensi nya bejalai enggau lanchar.-TVS
