SARATOK, 9 Ogos: Rayat di menua pesisir diperansang patut pintar ngerebut peluang inisiatif pelajar pechuma ke deka dipejalaika Perintah Sarawak.
Senator Pele Peter Tinggom madah, bala apai indai patut meda inisiatif nya nyadi peluang besai ngagai bala anak sida nampung pelajar ngagai tikas ke lebih tinggi.
“Pasal polisi ke manah diaduka Perintah Sarawak taun 2026 tu enti anak kita udah abis Pom 5, Pom 6 diterima ulih universiti baruh Kerajaan Sarawak nyadi semua ungkus belajar nya pechuma, sesen pan apai indai nadai agi bebayar taun 2026.
“Nya alai, aku ngasuh kita apai indai anang enda ngasak bala anak kita sekula, asuh sida belajar bebendar sampai tembu.
“Sayauka polisi ti manah, duit diberi perintah ngagai kitai meri pemansang modal mensia ba menua kitai Sarawak,” ku iya.
Iya mansutka penemu nya maya Pengerami Bejadika Bulan Merdeka Tikas Sekula Primari (SK) Kalaka Central Saratok ditu kemari.
Ku iya, nadai kebuah bala nembiak ba menua pesisir enda nampung pelajar sida ngagai tikas ke tinggi laban perintah besai mega bisi nyendiaka bantu khas ungkup nembiak Bumiputera nengah Turu Pelajar Tinggi Nasional (PTPTN) enggau Kaunsil Amanah Rayat (MARA).
Tandu iya, bala anak Sarawak patut berasai betuah laban Perintah Sarawak aja wilayah ke bisi nyendiaka inisiatif pelajar pechuma ngagai raban siswa siswi di menua tu.
Inisiatif pelajar pechuma di nengeri tu deka berengkah taun 2026 ngaul enam palan pelajar tinggi diempu Perintah Sarawak.
Palan pelajar tu mungkur Kolej Laila Taib (KLT), Universiti Curtin, Universiti Swinburne, Universiti Teknologi Sarawak (UTS) Kolej Universiti I-CATS enggau Palan Penyulut Teknologi Sarawak (CENTEXS).-TVS
