SARATOK, 9 Ogos: Rebak baru patut diberi penerang ke betul pasal sejarah ke udah ngujungka penumbuh sebuah menua ke dikumbai Malaysia.
Kaban Kunsil Nengeri (ADUN) Krian Friday Belik madah, kebuah pia laban agi mayuh rebak baru saru enggau enda nemu pasal sejarah ke amat ngujungka penumbuhka nya.
“Malaysia ditumbuhka kena 16 September 1963, ukai 31 Ogos 1957.
“Nya alai kitai ngintu Hari Malaysia kena ke 16 September ninting taun.
“Tu mih bida iya lalu mayuh orang saru ngumbai kitai Sabah Sarawak masuk Malaysia tang kebendar kitai sama-sama begulai enggau sida Malaya, Sabah enggau Sarawak numbuhka Malaysia.
“Ukai kitai masuk Malaysia, tang kitai sama-sama begulai enggau Malaya, Sabah enggau Sarawak numbuhka menua dikumbai kitai diatu Malaysia.
“Enti nadai Sabah, Sarawak tentu nadai Malaysia,” ku iya.
Iya madah munyi nya maya bejaku ba Pengerami Bejadika Bulan Merdeka Tikas Sekula diatur Sekula Primari (SK) Kalaka Central Sarawak, kemari.
Ku iya, penerang nya patut disebar ngagai rebak baru ngambika sida nyadi orang ke pintar pasal sejarah penumbuh sejarah dudi hari.
Tandu iya, nya mega dikena nyeliahka runding rebak baru pasal sejarah mudah dikuingka raban ke enda mereti dudi hari.-TVS
