KAPIT, 9 Ogos: Penanggul jalai sekut ti ngirauka ati pengani enggau penguna jalai alun di kandang menua Kapit deka diputarka enggau lengkas.
Menteri Kereja Raya, Datuk Seri Alexander Nanta Linggi madahka pekara nya udah bulih perati ari Premier Sarawak, Datuk Patinggi Tan Sri Abang Johari Tun Openg.
“Penanggul penyekut jalai alun di Kapit siti penanggul ke nyata. Lebuh penemuai Premier ke Kapit taun nyin kemari.
“Siti peminta senentang ungkup dikena mutarka penanggul tu udah dipadahka iya. Lalu tu deka diatur,” ku iya.
Iya madah munyi nya rambau aum media sepengudah aum matau Projek Rentayan Menua Pesisir Begulai enggau JKR Bagi Menua Enggau Pengari Rayat Lokal ba Opis Residen Kapit, ditu kemari.
Nanta ke mega Kaban Parlimen Kapit ditanya senentang status ngangkat manah jalai di kandang endur nya ke diatu suah ngembuan penanggul jalai sekut, lebih agi lebuh musin pengerami.
Ba awakka sama Sapit Premier Sarawak Datuk Amar Douglas Uggah Embas madahka Perintah Sarawak ngembuan pelin timpuh pandak dikena ngurangka penanggul nya dalam timpuh ke semak.-TVS
