KUCHING, 9 Ogos: Premier Sarawak Datuk Patinggi Tan Sri Abang Johari Tun Openg madahka naka tu lebih 13,000 anak Sarawak udah ngaga peminta nengah inisiatif laptop pechuma.
Iya madah, urung RM15 juta diagih dikena ngemujurka pengawa dibaruh Bajet Sarawak 2024 ke diatur Yayasan Sarawak.
“Perintah Sarawak udah meri agih belanja RM15 juta dikena nyendiaka laptop pechuma ngagai bala anak kitai ke belajar ba IPTS tauka IPTS.
“Kitai nemu chara belajar diatu udah jauh berubah dibanding enggau suba.
“Nya alai aku ngaga pemutus udah berunding enggau bala bakih ke bukai…kitai bisi program meri komputer pechuma ngagai bala anak kitai,’ ku iya.
Ku terang iya, inisiatif nya deka meri pemaik ngagai lebih 5000 iku anak Sarawak ke patut bepelasarka pekara ke udah ditetapka.
Urung 50 iku nembiak ngaul sida ke belajar ba Swinburne University Of Technology, Â I-Cats University College, Â Universiti Malaysia Sarawak (Unimas), Universiti Teknologi Mara Sarawak enggau Politeknik Kuching nerima kelai pemeri laptop pechuma ti disuaka Premier Sarawak.
Haribulan minta laptop pechuma nya deka ditutup kena 14 Ogos tu.
Berebak enggau nya, Anugerah Khas Premier Sarawak (AKPS) ke-31 bela udah disuaka ngagai sekula, Gerempung Apai Indai enggau Pengajar (PIBG), pengajar enggau nembiak ke udah mandangka penyulut ba bidang akademik taun 2022 enggau 2023.
Urung 22 penerima ungkup taun 2022 diberi AKPS ke ngaul insentif khas sepenyampau RM 107,000.00. Udah nya ungkup taun 2023, bisi 26 penerima udah diberi AKPS lalu penyampau semua insentif khas tu manggai RM131,000.00.-TVS
