BETONG, 6 Ogos: Projek Ngemanah Klinik Pengerai Indai enggau Anak (MCH) Debak ke beungkus RM11 juta dibaruh Ejensi Pemansang Bagi Menua Betong (BDDA) diatu ba proses nyiri konsultan.
Kaban Kunsil Nengeri (ADUN) Saribas Datuk Mohd Razi Sitam madah, projek ngemanah klinik nya chukup beguna laban begunan lama ba klinik nya udah kelalu repuk.
“Begunan Klinik Indai enggau Anak (Debak) diatu udah kelalu repuk.
“Nya alai, aku udah mantaika perambu maya aum BDDA minta agih belanja ari perintah nengeri dikena ngererak enggau enggau ngaga baru begunan nya ke beungkus manggai RM11 juta,” ku iya.
Razi mansutka timbal penemu nya maya dirandau media pengudah Pengawa Nyerahka Chek MRP Kaban Parlimen Betong Dr Richard Rapu ba Palan Servis ADUN Saribas, kemari.
Ku iya, enti udah tembu ila projek nya deka meri pengelantang ngagai mensia mayuh ke diau besemak lebih agi peranak Debak.
Tandu iya, pekara bukai ke bela dipasuk dalam skop projek tu iya nya ngemanahka Palan Hemodialisis
enggau pengawa ngaga Klinik Ngeli Pengerai Debak ke baru.
Ke penerang, Klinik Pengerai Indai enggau Anak Debak ditumbuh ba taun 1970-an kelia.-TVS
