BINTULU, 6 Ogos: Opis Kereja Raya (JKR) bagi menua Bintulu dipinta matau projek Palan Administrasyen Pekereja Perintah Sarawak (IAC) di bagi menua Bintulu.
Sapit Premier Sarawak Datuk Amar Douglas Uggah Embas madahka berindik ari gaya hari ka chukup manah, pekereja ka chukup sereta kereban dikena bejalaika pengawa berumah bisi disediaka ditu nadai kebuah projek tu napi pengelaun.
Projek ti udah nyapai 68.88 peratus tembu nya diripihka tembu ba ujung bulan Mac 2025.
“Sepengudah berandau senentang pejalai projek tu enggau raban JKR, projek tu diripihka tembu kena bulan Mac 2025 lalu aku minta projek tu chakah agi dipatau ke alai jematan Jepak mega diripihka tembu kena bulan February 2025”.
“Bintulu chukup betuah enti kita beratika lebuh kitai ngintu Hari Sarawak bedau lama ka udah, jematan Jepak diberi lampu lalu dipeda chukup manah. Jematan nya disema enggau jematan Golden Gate di San Fransisco lalu tu siti kelai di bagi menua Bintulu,” ku iya madah lebuh dirandau pemberita sepengudah ngabas taba projek begunan IAC, ditu.
Uggah ke mega Menteri Pemansang Infrastruktur enggau Penyangkai Kapal (MIPD) Sarawak madahka enggau pemisi begunan ka baru, sereta nyadi kelai ba menua tu ulih mantu meri peransang ngagai pekereja perintah ka deka gawa ari nya sereta ungkup pengelantang rayat di bagi menua tu ngambika sida ulih nerima servis ka chukup manah.
Ke mega ngulu pengawa ngabas taba projek tu iya nya Sapit Menteri Pemansang Infrastruktur enggau Penyangkai Kapal Sarawak (Pemansang Infrastruktur) Datuk Ir. Aidel Lariwoo, Menteri ba Opis Premier Sarawak Dato’ Sri John Sikie Tayai, Sekretari Mendam ba Opis Menteri Pemansang Infrastruktur enggau Penyangkai Kapal Sarawak Datuk Chiew Chee Yau enggau Direktor ba Opis Kereja Raya (JKR) Sarawak Ts. Gs. Bs. Ir. Dr Cassidy Morris. – TVS
