DEBAK, 6 Ogos: Tikas penyampau bantu tasah dibaruh Opis Pengintu Pendiau Raban Bansa Sarawak (JKMS) diperambu deka ditiki enda lama agi.
Menteri Pemansang Indu, Anak Mit enggau Pengelantang Komuniti, Dato Sri Fatimah Abdullah madah, keretas pansik ungkup tuju nikika penyampau bantu nya deka dibantai ngagai Kaunsil Aum Perintah Nengeri (MMKN) ti deka datai.
“Puji Tuhan aum Kaunsil Perintah Nengeri (MMKM) deka ngemujurka keretas pansik nya ti deka dibantai.
“Dalam keretas pansik nya kami deka minta nikika bantu tasah ungkup sida ke tebunsa mungkur penusah ampuh bah, kemarau, angus rumah enggau tanah tusur,” ku iya.
Iya mansutka penemu nya ngagai media pengudah Bejadika Pengawa Nyerahka Mesin Hemodialisis Dibaruh Inisiatif Bantu Khas Pesakit Tungkul Sengayuh Bagi Menua Betong ditu, kemari.
Fatimah taja pia madah naka tu bedau bisi perambu nikika penyampau bantu Am dibaruh opis menteri iya.
Taja pia, ku iya deka bisi penendur ungkup penerima bantu kategori nya endur sida ke beumur 60 taun iya nya sida ulih nerima bantu ninting bulan sepenyampau RM500 dibaruh Skim Orang Lunggar Umur.-TVS
