DEBAK, 6 Ogos: Opis Pengintu Pendiau Raban Bansa Sarawak (JKMS) nyaran urung 100, 000 iku penerima bantu dibaruh Skim Orang Lunggar ninting taun.
Menteri Pemansang Indu, Anak Mit enggau Pengelantang Komuniti, Dato Sri Fatimah Abdullah madah, ungkup taun 2024 urung 75, 000 penerima ngasaika pemaik nengah skim nya dibaruh JKMS.
“Kitai ntaran taun tu iya nya 100,000 orang tuai ke udah chukup umur dipasuk dalam sistem.
“Naka tu, dalam sistem bisi 75,000 iku nama orang tuai datai ari JKM enggau mega ari e-kasih udah ditisih.
“Nama sida ke udah dipasuk dalam sistem, reti nya bedau datai 100,000 sida ke udah chukup umur minta.
“Nyadi sida ke udah chukup umur nya tau minta diatu laban kitai nyaran taun tu deka nyapai saran 100,000 penerima,” ku iya.
Iya mansutka jaku nya ngagai media pengudah bejadika Pengawa Nyerahka Mesin Hemodialisis dibaruh inisiatif Bantu Khas Pesakit Tungkul Sengayuh Bagi Menua Betong ditu, kemari.
Dulu ari nya, Fatimah ngemujurka pengawa nyerahka lima buah mesin hemodialisis beungkus RM205,750 ngagai dua buah sepital di Betong iya nya sebuah ungkup Sepital Saratok enggau sebuah agi ungkup Klinik Pengerai Debak.
Bisi 24 buah mesin hemodialisis dianjung ngagai 14 buah sepital ke udah dipilih ba serata Sarawak nyengkaum ba Palan Tungkul Ati Sarawak ke beungkus manggai RM987, 600.
Sama bisi ngulu pengawa tu Sapit Menteri Pemansang Indu, Anak Mit enggau Pengelantang Komuniti Sarawak Datuk Mohd Razi Sitam enggau ke bukai.-TVS