BETONG, 6 Ogos: Kaban Parlimen Betong Dr Richard Rapu madah diri deka terus bebendar mantu sekula dibaruh kunstitusyen iya,
Ku iya, pekara nya dikena nentuka semua nembiak enggau pengajar lantang belajar enggau ngajar sepanjai maya.
“Kitai endang seruran nerima lalu aku begulai enggau YB (Datuk Mohd Razi Sitam) deka nyeraris semua guna ba genap sekula.
“Kami deka mantu nengah nama aja belanja sekalika nya ari perintah besai tauka ari perintah nengeri baka nguna RTP, PMR enggau ke bukai.
“Kitai deka nyerariska belanja ke udah bisi dikena mantu enggau nentuka sekula tu lantang alai belajar enggau ngajar,” ku iya.
Iya mansutka penemu nya maya Pengawa Nyerahka Chek Projek Mit Pemansang Menua Pesisir (MRP) Kaban Parlimen Betong ba Palan Servis ADUN Saribas, kemari.
Nya alai, Dr Richard ngarapka pemeri nya ulih mantu ngemujurka genap program ke udah diperambu sekula nengah Gerempung Apai Indai enggau Pengajar (PIBG) ke pemaik bala nembiak.
Dulu ari nya, bisi RM137, 000 chek MRP Kaban Parlimen Betong udah diserahka ngagai 17 penerima mungkur raban PIBG ba DUN Saribas.
Ungkup rikod bisi 40 buah sekula primari enggau sekula sekondari bisi ba sitak Parlimen Betong.
Ba taun 2023, sepenyampau RM800, 000 ari agih belanja RM2 juta dibaruh Projek Mesra Rayat (PMR) Kaban Parlimen Betong udah disadung ungkup tuju ke sebaka.-TVS
