KUCHING, 4 Ogos: Penegap ba pekara wang enggau pelajar entara pekara ti dikenatika administrasyen Perintah Sarawak pengudah beratika pekara ke udah dulu nyadi sebedau wilayah tu merdeka, ku Datuk Patinggi Tan Sri Abang Johari Tun Openg.
Premier Sarawak madahka, iya sigi meri perati khas ngagai dua pekara nya kenyau dichiri nyadi kepala menteri dalam taun 2017 seruran ngenang pesan niang apai iya ke nyadi Tuai Pemegai Menua (TYT) Sarawak keterubah, Tun Abang Openg Abang Sapiee ti mekuhka pemesai guna wang enggau pelajar.
“Niang kala madah maya anti – cessation, nama kebuah Sarawak diserah ngagai koloni laban penuduk pekara wang kitai enda ulih dikena ngatur nengeri tu enti nyema merdeka.
“Kitai bedau bisi puncha penatai pemisi ke chukup, kelebih agi pengudah perang dunya, enti penatai pemisi kitai enda tegap tauka chukup, kitai bisi pemar deka bejalaika pemansang enggau meri bantu ngagai rayat.
“Aku belajar senentang pekara nya ti dikumbai penegap ba pekara wang. Nya kebuah pengudah aku diberi peluang nyadi tuai perintah, aku negapka pekara wang nengeri. Enti pekara wang kitai Sarawak ba penuduk ke tegap, nya ngemudahka kitai mantu rayat.
“Aku belajar dua pekara ari niang iya nya pelajar enggau penegap ekonomi,” ku iya bejaku ba rambau Program Ngelancharka Biografi Gabenor Pertama Sarawak, Tun Openg ba Hikmah Exchange Event Centre ditu, sehari tu tadi.
Sama bisi datai Sapit Premier Sarawak, Datuk Amar Awang Tengah Ali Hasan, Datuk Amar Douglas Uggah Embas enggau Datuk Amar Dr Sim Kui Hian enggau Sekretari Perintah Sarawak, Datuk Amar Mohamad Abu Bakar Marzuki.
Nangkan ke nya, pasal pekara pelajar, Abang Johari nerangka, aspek nya dikemeratka ba baruh administrasyen ti ba baruh iring iya dikena nentuka genap iku anak Sarawak ulih ngasaika pengidup jemah ke lebih menyana.
“Pekara pelajar sigi dikemeratka ungkup anak Sarawak ngambika sida bepenau enggau bepenemu baka niang (Tun Openg) ti gawa seraya belajar.
“Kitai semua mesti meri pelajar ke chukup ungkup pengidup jemah ke lebih manah, nya mih kebuah kami (Perintah Sarawak) ngaga pemutus meri pelajar tinggi pechuma ngagai anak Sarawak ba renggat universiti,” ku iya.-TVS
