MIRI, 4 Ogos: Raban nembiak diperansang patut mantaika buah runding ke lebih kreatif dikena bedajaka Miri ngagai temuai sekalika ari luar Sarawak tauka menua luar.
Menteri Pengangkut, Dato Sri Lee Kim Shin madahka, tetiap pelilih tauka kandang endur di Sarawak bela ngembuan penyelai enggau pemanah.
“Aku ka meda mayuh agi nembiak mantaika buah runding kreatif baru sida enggau meda baka ni sida ulih bedajaka Sarawak, ketebal agi di Miri.
“Laban kitai sigi nemu tetiap kandang endur bisi penyelai enggau pengelebih,” ku iya.
Kelimpah ari nya, ya mega berasai temegah ati laban diatu Miri udah bisi dua taba lanting UNESCO, pemayuh leman etnik ti mendam ba sesebengkah kandang endur.
“Kuching bisi penyelai ari sukut budaya. Miri bisi pengelebih iya nya bisi dua taba lanting dunya ba baruh UNESCO, tasik enggau tebing tasik.
“Nyauka semua etnik ulih ditemu kitai di Miri, bela ngembuan pemayuh leman budaya.
“Kitai ulih ngelakuka pemanah tu ngambika orang luar ulih milih ni bagi endur ke deka dilawa sida,” ku iya bejaku maya rambau dirandau media beserimbai enggau Festival What About Kuching (WAK) Miri di Coco Cabana, kemari.
Nangkan ke nya, Kim Shin ngarapka, nengah achara ti diatur nembiak bisi daya matak penatai temuai, nambahka penyampau komuniti lokal ngaul diri sereta meransang kreativiti rebak biak sereta nyungkak dagang temuai di wilayah tu.
Tandu iya, pemisi Jalai Besai Pan-Borneo ti enda lama agi tembu penuh ngemudahka mensia mayuh mindah ari mengeri Miri ngagai mengeri bukai seraya ngemanahka bungkur penyambung entara mengeri di serata Sarawak.-TVS