MUKAH, 3 Ogos: Bisi semilan iku pengani nadai rumah endur ngenduh nyengkaum tiga OKU enggau dua iku anak mit sepengudah rumah sida angus di Kuala Balingian, Mukah dituntung penusah angus tumu pagi tadi.
Pengari Palan Operasyen Bomba Sarawak (PGO) madahka, raban ari Balai Bomba enggau Penyah Penusah (BBP) Mukah udah dianjung ngesah palan penusah nyadi pengudah nerima kangau urung pukul 2.35 pagi.
“Sepengudah datai ba palan penusah nya, sebuah rumah kedai seringkat (struktur enda tetap) enggau pemesai 50×30 kaki persegi nya udah 100 peratus angus,” ku iya.
Nitih penerang iya, raban bomba madamka api ngena pam angkut 100 kaki enggau penatai ai tebuka ke besemak.
“Nadai penusah bakal tauka bebadi nyawa diripotka lalu penyampau pengerugi agi ditasat,” ku iya.
PGO madahka, dua iku raban polis mega bisi mantu ba palan nya lalu operasyen nya tembu urung pukul 4.48 pagi.-TVS