BINTULU, 3 Ogos: Dua pekereja kapal peranak lokal bebadi nyawa lalu siku agi raya bakal ba insiden meletup ke nyadi ba bilik injin sebuah kapal di kandang tasik Bintulu, Hari Enam.
Lebuh ngenukuka pekara nya, Penulung Direktor Operasyen Bomba enggau Penyah Penusah (JBPM) Nengeri Sarawak PgKB 1 Henderi Ardimansyah madah, raban sida nerima kangau bekaul insiden nya pukul 12.57 tengah malam tadi.
“Bekaul enggau kes insiden meletup ba sebuah kapal di Bintulu, raban bomba bisi nerima kangau ari raban sepital (KKM) urung pukul 12. 57 malam tadi.
“Pengudah nerima kangau nya kami terus ngerah raban kami nguna sebuah ambulans ditepan tiga kru ngambika mantu raban KKM ngatur tudah sida ke bebadi, tiga iku sida udah dibai ngagai Jelatung Pengkalan Bintulu sereta diberi perubat ke patut,” ku iya.
Nitihka penerang dipansutka Balai Polis Bintulu, dua tudah sida ke bebadi nyawa iya nya pemantu injinir kapal asal ari Perak beumur 36 taun benama Muhamad Firdaus enggau Oiler Kapal benama George beumur 24 taun ari Sibu, Sarawak.
Udah nya, Ahmad Zahid beumur 22 ari Sabah ke benung raya bakal diatu agi ditan ba wad emejensi Sepital Bintulu ngambika diperubat meruan.
Dulu ari nya, bisi 16 iku anak kapal tauka pengereja pengawa Serikat Icon Offshore benung ba atas Kapal Supply Amara begau pengudah insiden meletup ke ingat didinga ba unit baruh kapal.
Pengudah diperesa dia bala pengereja pengawa tepedaka bilik injin kapal nya udah angus.
Penusah nyadi urung 23 batu nautika ari Pantai Samalaju Bintulu.
Tudah ke bakal udah dibai ngagai Jelatung Pengkalan Bintulu ngambika diperubat meruan ditangkan dua iku agi dikenuku bebadi nyawa ku raban pengerai Sepital (KKM) Bintulu.
Bangkai tudah ke bebadi nyawa udah dianjung ngagai Sepital Bintulu ngambika dibuntas sereta dipansik.-TVS
