PUTRAJAYA, 1 Ogos: Opis Menteri Pelajar Tinggi (KPT) deka lengkas ngaga ripot polis bekaul enggau tuduh nyual setipikit pelajar ari renggat sekula nyentuk pelajar tinggi baka ke diripotka surat kabar menua kemari.
Menteri Pelajar Tinggi Datuk Seri Dr Zambry Abd Kadir madah atur tu nyereminka pengeransing KPT ti nadai belembut sereta nentuka atur terit dipejalaika ngagai sebarang Palan Pelajar Tinggi Perintah (IPTA), Palan Pelajar Tinggi Peribit (IPTS) tauka sebarang orang ke bekaul.
“Aku deka meri tangkan ngagai IPTS enggau IPTS ngambi enda ngemendarka ulah ke baka tu ari terus nyadi laban nya deka ngasuh mensia mayuh saru sereta ngerusak nama palan universiti.
“KPT deka terus komited nentuka sistem pelajar tinggi enda kamah enggau ngelanggar undang-undang,” ku iya nengah sebengkah penerang ditu sehari tu tadi.
Media ngeripotka sindiket nyual sitipikit akademik palsu nengah tali arus sechara terang iya nya ngelakuka ulah sida ba media rama enggau rega antara RM1,500 ngagai RM4,000.
Ulah nya didawa nyelinting raban ke gagit deka bisi pengaku akademik dikena ngulihka pengawa.
Zambry madah bisi sekeda tipu setipikit akademik udah mujur tebantai ngelama tu nengah ripot ari mensia mayuh ngaul sindiket nipu ti ngumpan orang ngena nama palan pelajar tinggi.
Ku iya pengawa matau sereta nyaga sepanjai maya terus dipejalaika Opis Pelajar Tinggi nengah chara bejalaika pengawa meresa IPTS seriris enggau Akta Institusi Pendidikan Swasta 1996 (Akta 555) bekaul mansutka setipikit palsu.
Kelimpah ari nya, ku iya KPT bisi Atur Pengawa Standard (SOP) ke diguna dikena nentuka pengamat setipikit akademik ungkup tuju diaku mensia mayuh.
Nya alai, iya ngelalau mensia mayuh seruran bejimat enggau sindiket nipu sereta ulah nyual setipikit akademik nya.
Mensia mayuh ulih meresa pengaku tauka penerang pasal penerima Ijazah Kehormat (Basa) enggau Ijazah Kedoktoran ba portal GREaT KPT nengah laman web https://dohe.mohe.gov.my/award/.-TVS
