SRI AMAN, 1 Ogos: Opis Bomba enggau Penyah Penusah (JBPM) Zon 3 Sri Aman deka meri fokus matau sitak ke mudah angus baka kebun, umai paya enggau palan tugung uras.
Tuai JBPM Zon 3 Sri Aman Penguasa Bomba (PgB) Muhammad Rais Adham Rosalan madah, nya beduduk ari sitak nya endang palan ke mudah angus bepelasarka rikod ngelama tu.
“Lebuh bejaku pasal musin kemarau tu nyadi pengirau raban Bomba enggau Penyah Penusah endang kes angus.
“Kes baka tu suah nyadi ba babas, kebun, umai paya enggau mega palan tugung uras.
“Nyadi sitak ke digaga kami iya nya Sri Aman, Betong enggau mega Saratok,” ku iya seraya madah sida ngerikodka kangau tasah bisi 77 isi bekaul enggau tasah angus kenyau ari taun 2023 nyentuk 2024.
Rais mansutka penemu nya maya dirandau TVS ba opis iya empu, kemari.
Ku terang Rais, kerejasama ari mensia mayuh ke diau besemak chukup beguna iya nya anang sengapa betunuka babas jam diatu dikena nyeliahka penusah enda disadang.
Mensia mayuh ke deka nunu ungkup tuju betanam betupi sida ulih betanya dulu enggau raban bomba tauka ejensi bukai ke bekaul.
Bepelasarka penerang ke pemadu baru ari Opis Bomba enggau Penyah Penusah Sarawak, ungkup timpuh 22 nyentuk 29 Julai tu tadi rikod ke angus diperati bisi kusut manggai 46 peratus dibanding timpuh ke sebaka ari 22 nyentuk 27 Julai minggu nyin tadi.-TVS