PUTRAJAYA, 31 Julai: Perintah Sarawak berengkah ngemeranka guna teknologi pemintar artifisyel (AI) dikena ngemansangka sektor nyaga pengerai enggau betanam betupi.
Premier Sarawak Datuk Patinggi Tan Sri Abang Johari Tun Openg madahka, tu berindik ari pemendar Kabinet Perintah Sarawak empai lama ke udah bekaul enggau perambu numbuhka Palan Pemintar Artifisyel Sarawak (SAIC).
Beduduk enggau nya, iya andal tikas penyikar enggau produktiviti di Sarawak ulih dikemanahka agi nguna teknologi AI.
“AI mega sebagi ari Pelin Tindak Ekonomi Digital Sarawak 2030 ti ngemeratka AI ba dalam pengawa ngaga pansik, pemansang enggau komersial.
“SAIC deka ngangkatka bakat lokal, matak tebangkar global enggau mai Sarawak nyadi pengerandang dalam teknologi AI di Malaysia sereta ngerumban nguna AI ba rayat Sarawak,” ku iya madah.
Iya madah munyi nya lebuh bejaku ba pengerami Experts Network in Technology, Innovation and Cooperative Event (MBOT ENTICE 2024) Hari Dua tu tadi.
Sama bisi datai Menteri Sains, Teknologi enggau Inovasyen (MOSTI), Chang Lih Kang.
Beserimbai enggau pengerami nya, Abang Johari nerima Anugerah Kepimpinan Teknologi ti diberi Lembaga Teknologis Malaysia (MBOT) ti ngaku pemeri iya dalam bidang teknologi enggau ekonomi gadung.
Sama bisi nyempulang Abang Johari, Sapit Premier Sarawak, Datuk Amar Douglas Uggah Embas, Sapit Menteri ba Opis Premier Sarawak (Perkara Korporat, Pemadah enggau UKAS) Datuk Abdullah Saidol enggau Sekretari Perintah Sarawak , Datuk Amar Mohamad Abu Bakar Marzuki.
Nangkan ke nya, Abang Johari nerangka, senentang guna palan data dalam ekonomi digital, perintah Sarawak mega udah bekerejasama enggau sektor peribit dikena numbuhka Palan Data Gadung.
“Kami benung ngemansangka sebuah Palan Data Gadung 200MW ti deka nyikap Sarawak enggau perengkaguna infrastruktur digital ti meruan, tegap kuasa, moden enggau nguna teknologi pemadu baru,” terang iya.
Tandu iya, semua perambu ti dipejalaika nya nyadi pugu ti tegap dikena Sarawak terus ngasaika pengelantang, inklusif enggau maju dalam aspek teknologi. – TVS
