PUTRAJAYA, 31 Julai: Sarawak diatu benung nempa pengidup jemah ti inklusif ungkup rayat nengah perambu enggau pengawa wilayah tu dalam ekonomi gadung sereta ekonomi digital, ku Datuk Patinggi Tan Sri Abang Johari Tun Openg.
Premier Sarawak madahka, pekara nya senutuk enggau perambu strategik ti ngemeranka guna teknologi pemadu baru dikena nyungkak ekonomi sereta matak pemansang ke meruan enggau dikena nambahka kualiti pengidup rayat.
Iya nerangka, perintah Sarawak komited ngemujurka juluk wilayah tu nguna chara mekuhka pemansang infrastruktur digital, teknologi gadung enggau pengawa mutar chara inovatif.
“Senutuk enggau pengawa deka ngerandang jalai dalam pemansang ekonomi digital, Sarawak udah ngelancharka Langkar Pengawa Ekonomi Digital 2030 ti deka ngubah Sarawak nyadi siti ekonomi ti dikemansangka sechara digital.
“Nya alai, dikena ngemujurka juluk nya, perintah Sarawak udah ngungkupka agih penyampau RM1.89 bilion dikena nambahka pemansang infrastruktur enggau pengelandik digital ba baruh inisiatif Sarawak Linking Urban, Rural and Nation (SALURAN).
“Tuju bejalaika projek tu iya nya deka nyendiaka bungkur internet ke laju enggau nambahka penyambung digital sereta nentuka semua rayat, ketebal agi di menua pesisir bulih pemaik bepelasarka peluang digital ke sama enggau nadai siku dikelaung ari ngasaika semua pemaik nya,” ku iya madah.
Abang Johari bejaku pasal nya maya Pengerami Experts Network in Technology, Innovation and Cooperative Event (MBOT ENTICE 2024), Hari Dua tu tadi.
Beserimbai enggau pengerami nya, Abang Johari nerima Anugerah Kepimpinan Teknologi ti diberi Lembaga Teknologis Malaysia (MBOT) ti ngaku pemeri iya dalam bidang teknologi enggau ekonomi gadung.
Abang Johari madahka, Sarawak mega deka numbuhka ekosistem teknologi ti dinamik lalu numbuhka Wang Turu Ekonomi Gagasan Anak Sarawak (TEGAS) Digital.
“Nengah 22 hab inovasyen enggau disukung perintah enggau pemain industri ulih ngelancharka penumbuh, inovasyen enggau nempa mayuh agi peluang gawa sereta ngembuan juluk deka nyadika Sarawak nyadi ‘Lebak Silikon’.
“Kitai ulih meda nyema siku orang dagang ti biak ba genturung ke jauh ulih ngaul diti tauka nempa teknologi, lalu nembiak di menua pesisir ngembuan akses pelajar ti sama enggau sida di mengeri.
“Tu meh pengawa inklusif ti digaga Sarawak jemah,” ku iya.
Berebak enggau nya, iya nerangka perintah Sarawak bisi langgur deka ngemansangka penyangkai kapal baru di Kuching dikena nempa kereban api gadung ungkup sektor kapal sereta bisi juluk deka nyadika penyangkai kapal nya hab serantau.
“Perengkaguna baka Terminal Gis dikena nyukung inisiatif kuasa beresi tu dikena nambahka pengeluar enggau pengawa ngidar/ngagih kereban api ti meruan.
Kelimpah ari nya, kami mega merambu deka ngaga sebuah padang bilun antarabansa baru di Kuching dikena nyukung industri penerebai bilun ti majak ngerembai,” Tandu iya. -TVS
