KUCHING, 31 Julai: Pengambi Khas Sarawak 2024 dijangka nyendiaka lebih 1,000 peluang gawa nyadi pengajar di wilayah tu berengkah pagila, 1 Ogos.
Menteri Pelajar, Inovasyen enggau Pemansang Bakat (MEITD), Dato Sri Roland Sagah Wee Inn madahka, tuju Opis Menteri Pelajar Malaysia (KPM) enggau Komisyen Servis Pelajar (SPP) muka peluang nya dikena mutarka isu suntuk pengajar ba nengeri tu.
Iya madahka, chalun ke mujur deka nerima kunterik pengelama dua taun enggau ngambi Diploma Pelajar ti dipelanja diri empu ba Maktab Pelajar, Palan Penarak Pengajar Malaysia (IPGM), nengah Kus Dalam Kemisi (KDC) sereta deka diberi pangku pengawa tetap ngajar bepanggai ba tisih kepenudi ari SPP.
“Latih pengambi khas nya tebuka ngagai semua graduet Ijazah Sarjana Muda ke bisi tauka nadai diploma tauka ijazah dalam bidang pelajar.
“Nyadi, nadai cuti pengelama dua taun ungkup sida tu ke suah dikangau pengajar sementara,” ku iya madah.
Iya madah munyi nya ba rambau aum media bekaul enggau isu Mutarka Penanggul Suntuk Pengajar Di Sarawak: Inisiatif enggau Ngemanahka Pengambi Baru ba Sarawak Skills di Kuching, sehari tu tadi.
Ku iya madah , inisiatif nya siti chara ti beguna amat dikena mutarka penanggul suntuk pengajar di Sarawak ngaul penyampau 2,373 iku pengajar manggai ujung taun 2024.
Nya alai, nengah pengambi khas nya tadi, dikearapka mayuh chalun ti patut minta ngisi peluang gawa nya nengah SPP.
“Nitihka penerang ari Opis Pelajar Sarawak, ujung taun tu, kena 31 Disember 2024, kitai deka betapi enggau penanggul suntuk 2,373 iku pengajar.
“Lalu kami melabaka senentang interbiu tu enggau latih pengambi tu sereta alai ti diatur Opis Menteri Pelajar Malaysia, iya nya entara bulan Julai enggau November taun tu, kami melabaka penyampau tu ulih dikurangka nyentuk 1,130 iku,” ku iya. – TVS
