BINTULU, 30 Julai: Siku lelaki ti ngena motosikal bebadi nyawa pengudah ngelantak sebuah kerita ba simpang lampu trafik Jalai Sultan Iskandar ditu, kemari.
Tuai Polis Pelilih Menua Bintulu, Superintenden Nixon Joshua Ali madahka Mahmud Nyalong, 37 taun bebadi ba palan penusah ke nya.
Ku Nixon madah asil pansik nya sida tetemuka kerita ke dideriba siku indu nya ari Bandar Jaya Bintulu nuju Kondominium Seaview Court nengah Jalai Sultan Iskandar.
“Lebuh datai ba simpang lampu trafik Jalai Sultan Iskandar lampu trafik maya nya bechura gadung, tudah ke deriba kerita nya ba lorong kedua ari kanan deka bepusin ke kanan neruska pejalai.
“Lebuh bepusin, motosikal ke ditepan siku lelaki datai ari belakang sepiak kanan lalu deka jalau lurus tang enda mukai-mukai ngelantak kerita ba sepiak kanan,” ku iya ba siti penerang ti dipansutka sehari tu tadi.
Ku iya madah agi orang ke nepan motosikal nya ditukuka pegawai perubat ba Sepital Bintulu ke datai ngesah penusah nya mati.
“Kes tu dipansik ba baruh Seksyen 41(1) Akta Pengangkutan Jalan 1987,” ku iya.
Nangkan ke nya, iya mega ngelalau mensia mayuh anang ngaga sebarang spekulasyen tauka ngaga berita ti enda engkeman bekaul enggau kes nya laban pekara nya ulih ngasuh komuniti irau ati.-TVS
