BETONG, 30 Julai: Sekula Sekondari (SMK) Saint Augustine Betong taun tu deka bebendar ngetanka gelar champion ke dijapai sida ba Pekit Olahraga Kaunsil Lumba Sekula-Sekula Bagi Menua Betong (MSSB) taun nyin kemari.
Tuai Jurulatih Kontinjen SMK St Augustine Ahmad Nooraffif Mohamad Nasir madah, kelimpah ari ngetanka gelar champion sida mega menalan alai sida nyikap raba atlit ti dilatih dibaruh Program Pemansang Olahraga ungkup pekit ba renggat nengeri ti deka datai.
“Ungkup taun tu kami deka bebendar ngetanka gelar champion.
“Serak tu kami bisi dua misyen iya nya kesatu ngetanka gelar champion, lalu kedua kya nya nyikap atlit kami ke udah belatih dibaruh Program Pemansang Olahraga Sekula ungkup besemekih ba rengat nengeri udah tu,” ku iya.
Iya mansutka jaku timbal nya maya dirandau TVS pengudah Pengerami Bejadika Pekit Olahraga MSSB Ke-20 ke dipenyadika ADUN Kalaka Mohd Duri ba Kompleks Lumba Betong, sehari tu tadi.
Ku iya, pengandal deka nyapai dua misyen nya meruan tinggi taja betapi enggau taga jam belatih ti kelalu serekat enggau pengawa bukai.
Taun nyin kemari SMK St Augustine mujur ngempu gelar champion pengudah bulih 31 midul emas, 21 pirak enggau 16 midul engkeraju.-TVS
