PUTRJAYA, 30 Julai: Datuk Patinggi Tan Sri Abang Johari Tun Openg madahka Anugerah Kepimpinan Teknologi ke diberi Lembaga Teknologis Malaysia (MBOT) ngagai iya ngembuan reti ti chukup besai.
Premier Sarawak madahka anugerah nya endang ungkup rayat Sarawak.
“Terima kasih ngagai MBOT laban udah meri aku anugerah tu.
“Tu anugerah ungkup rayat Sarawak, ukai anugerah ungkup aku kediri empu,” ku iya.
Iya munyi nya rambau aum media pengudah nerima anugerah ke disuaka Menteri Sains, Teknologi enggau Inovasyen (MOSTI), Chang Lih Kang beserimbai enggau Pengerami Rentayan raban tebangkar dalam Teknologi, Inovasyen enggau Achara Koperasi (MBOT ENTICE 2024) ditu , sehari tu tadi.
Sama bisi nyempulang Abang Johari ba pengerami nya iya nya Sapit Premier Sarawak Datuk Amar Douglas Uggah Embas, Sapit Menteri ba Opis Premier Sarawak (Perkara Korporat, Pemadah enggau Komunikasyen Perintah Sarawak), Datuk Abdullah Saidol enggau Sekretari Perintah Sarawak, Datuk Amar Mohamad Abu Bakar Marzuki .
Berebak enggau nya, Chairman MBOT, Datuk Ts. Ir. Dr. Siti Hamisah Tapsir madahka dedikasyen Abang Johari, timpai ti jauh sereta nyadi tuai ke chukup manah dalam ngemansangka Sarawak entara kebuah iya diaku sereta patut nerima anugerah nya.
Nangkan ke nya ku Siti Hamisah, iring tuai Abang Johari tu udah meri inspirasyen ngagai kitai dikena nyapai tikas ke lebih tinggi lebih agi ba sektor ekonomi gadung enggau kuasa ulih dikemaru.
“Tiap kali aku nemuai ke Sarawak, aku deka ngaul diri enggau teknologi di Sarawak.
“Sida din (Sarawak) udah teperansang enggau visyen YAB Datuk Patinggi (bekaul enggau teknologi gadung),” ku iya lebuh bejaku ba pengerami nya. -TVS.
