BETONG, 30 Julai: Pengawa ngatur aktiviti lumba ba renggat sekula tauka bagi menua endang pantar pemadu manah dikena nempa modal mensia ke bekualiti ngambika ulih ngiring menua dudi hari.
Kaban Kunsil Nengeri (ADUN) Kalaka Mohd Duri madah, nengah pengawa lumba nya deka ngujungka sesiku nembiak nya dilatih ari segi runding enggau tubuh ke mega nyadi pekara beguna ungkup pemansang menua jemah ila.
“Kitai bela nemu nengah aktiviti lumba kitai ulih ngemansangka modal mensia ke bekualiti sereta nyadi pengerandang pemansang menua ngambika pegari.
“Program tu mega nyadi pantar dikena nerenak ulah ke manah enggau ngedut kaul enggau pangan diri.
“Kelimpah ari nya, iya mega nyadi pantar endur nembiak mandangka bakat diri laban aku pechaya iya ukai semina nyadi endur bepekit tang mega nyadi kelang endur nempa pemerani sereta nyadi peransang ngagai nembiak besekula,” ku iya.
Iya mansutka penemu nya maya bejadika Pekit Olahraga Kaunsil Lumba Sekula-Sekula Bagi Menua Betong (MSSB) Ke-20 Taun 2024 di Kompleks Lumba Betong, sehari tu tadi.
Ku iya, kelimpah dikena ngedut kaul enggau pangan diri, aktiviti lumba mega chukup badas dikena nerenak ulah ke manah ba raban nembiak.
Nangkan ke nya, Mohd Duri madah nengah aktiviti lumba mega raban nembiak nempa pemerani ngemansangka diri dalam sebarang aja bidang kelimpah ari pengawa lumba.
Taun tu gintir Sekula Sekondari (SMK) Saratok nyadi tuai rumah ngatur Pekit Olahraga MSSB Ke-20 Taun 2024 pengelama lima hari berengkah 28 Julai nyentuk 2 Ogos sereta pengawa nutup pekit tu ila deka diperambu dikemujurka Kaban Parlimen Betong Dr Richard Rapu.
Pengawa nya dipasuk urung 1,228 iku penyereta nyengkaum 316 pegawai ari 14 buah sekula sekondari di Betong sereta sebuah Kolej enggau Maktab Rendah Sains Mara (MRSM).
Nangkan ke nya, ungkup zon ngemataka lapan zon ngambi bagi iya nya Zon Saratok, Zon Spaoh, Zon Betong, Zon Debak, Zon Pusa, Zon Krian, Zon Roban, Zon Kabong nyengkaum sekula ari Program Pelajar Khas Intergrasi (PPKI).-TVS
