KUCHING, 28 Julai: Petroliam Nasional Berhad (PETRONAS) bisi timpuh tiga bulan nyentuk bulan Oktober taun tu nyapai resolusyen begulai enggau Petroleum Sarawak Berhad (PETROS) bekaul enggau pekara ngagih gis di Sarawak.
Premier Sarawak Datuk Patinggi Tan Sri Abang Johari Tun Openg madahka, PETRONAS deka berunding silik agi bekaul enggau garis gis chair (LNG) di wilayah tu.
“Endang amat sida minta Perintah Sarawak ngelanjar timpuh berengkah 1 Julai tu tadi lalu kami semina meri timpuh tiga bulan aja. Pengawa nya mesti tembu bulan Oktober tu.
“Enti enda, Perintah Sarawak deka meratika pengawa ngagih gis, sereta sekeda kompeni industri minyak enggau gis baka PTT Exploration and Production Public Company Limited (PTTEP), Mubadala enggau ExxonMobil mega bisi ati deka meranak puku di Sarawak,” ku iya madah.
Iya meri timbal senentang penerang ari PETRONAS dalam siti artikel Hari Lima tu tadi, pasal PETRONAS diatu benung berunding enggau PETROS dikena nyapai resolusyen begulai pasal pengawa ngagih gis di Sarawak.
Artikel nya madahka aum nya mekuhka pekara ti diguna semua raban nyengkaum ngaku pemar ke ditapi entara pangan diri dikena nyapai asil begulai.
PETRONAS deka terus nyadi kaban strategik ngagai Sarawak dikena ngetanka gaya meranak puku ti ngerembai maju enggau kondusif di Malaysia.
Tandu Abang Johari, PETROS udah diberi kuasa ngeluarka lisin ngagai pemeranak puku ti deka mai modal/puku sida di wilayah tu.
Bedau lama tu tadi, RHB Investment Bank Bhd dalam siti surat pansik madahka PETRONAS deka lenyau sebagi ari asil laban enda agi nyadi agregator gis tunggal di Sarawak.