MIRI, 28 Julai: Penyampau RM316 juta udah dikemendarka perintah besai dikena bejalaika Projek Mutarka Penusah Ampuh Bah Tebing Tasik di Sarawak.
Sapit Menteri Besai, Datuk Seri Fadillah Yusof madahka, projek nya dipejalaika ngaul 17 endur ba wilayah tu dikena nyaga kurang lebih 45,000 iku perayat ke mendam ba tebing tasik ari penusah ampuh bah enggau tebing tasik tusur.
“Penetap pakej projek nitihka endur ti ditentuka Opis Parit enggau Entali Ai (JPS) Sarawak sebedau proses pengulih berengkah dipejalaika enggau disadang deka berengkah ba taun 2025 ti ngaul pengawa bejalaika kereja nyaga ba tebing tasik sepemanjai 40 kilometer (km) , ” ku iya madah.
Iya mansutka jaku nya ngagai media pengudah ngemataka program nyerahka Projek ke Udah Tembu Opis Parit enggau Entali Ai (JPS) ngagai Perintah Sarawak di Lutong, Hari Enam tu tadi.
Iya ke mega Menteri Idar Kuasa enggau Transformasyen Ai nerangka, projek nya ngaul 17 bengkah endur baka Kampung Siru Melayu enggau Rambungan Stoh di Bagi Menua Kuching, Pantai Kampung Semarang, Rumah Ek-Rumah Betty, Pantai Kampung Beting Maro enggau Pantai Maludam di Bagi Menua Betong sereta Jalai Mukah- Oya (Kampung Judan), Kampung Baru Rajang, Kampung Tekajong enggau Sebako-Sedi di Bagi Menua Mukah.
Projek nya mega mungkur kandang endur Pantai Sungai Bangat (Bagi Menua Limbang), Pantai Lutong, Bungai Bekenu, Peliau Bungai, Kampung Kuala Sibuti enggau Pantai Bakam (Bagi Menua Miri), sereta siti endur projek ba Bagi Menua Samarahan enggau Kampung Seberang Sebuyau ba Pelilih Sebuyau.
Tandu iya, bepelasarka rikod, ba baruh agih pemansang nyentuk ke Rolling Plan Keempat (RP4) Perambu Malaysia Lumpar Kedua Belas (RMK12), perintah besai nengah Opis Menteri Idar Kuasa enggau Transformasyen Ai (PETRA) udah ngemendarka 46 projek bekaul enggau Puncha Ai (JPS), Bekal Ai (BBA) enggau Servis Parit (JPP) ngambika dipejalaika di Sarawak sereta nya nguna semua kos penyampau RM6 bilion.
Iya nerangka, penyampau agih ti udah dikemendarka ungkup timpuh digaga ba baruh RP4 RMK12 ba taun 2024 ungkup Sarawak manggai RM299 juta. – TVS
