PUTRAJAYA, 28 Julai: Sepenyampau 317 kes baru bekaul tabin tauka sakit denggi enggau empat kes pemati dirikodka dalam Minggu Epidemiologi Ke-29 (ME29) iya nya ungkup timpuh ari 14 nyentuk ke 20 Julai tu tadi.
Tuai Direktor Pengerai, Datuk Dr Muhammad Radzi Abu Hassan madahka, penyampau nya ngayanka penambah ari 2,373 kes ba Minggu Epidemiologi 28 (ME28) ngagai 2,690 kes ba ME29 enggau 69 kes pemati ketegal komplikasyen denggi.
Ku iya madah, penyampau lokaliti ‘hotspot’ ti dirikod ba ME29 iya nya 94 lokaliti ti dibanding enggau 100 ba minggu sebedau tu enggau 71 lokaliti di Selangor, enam di Perak, enam di Wilayah Persekutuan Kuala Lumpur enggau Putrajaya, empat di Negeri Sembilan enggau Kedah, dua di Sabah sereta siti di Kelantan.
“Kes survelan chikungunya bisi ngerikodka empat kes ba ME29 lalu penyampau kumulatif kes chikungunya nyentuk ke sehari tu iya nya 58 kes.
“Survelan Zika sepenyampau 1,505 sampel darah, lapan sampel ai kemi enggau tiga sampel ai serebrospinal udah diperesa Zika lalu pemutus semua nya negatif,” ku iya madah nengah penerang sehari tu.
Berindik ari nya, iya meri langgur penemu ngambika semua raban bejalaika aktiviti ngerupan sereta nyadika One Hour Malaysia Clean Up aktiviti ninting bulan iya nya kena hari enam, minggu keempat ninting bulan dikena meresika endur diau sereta nyeliahka penyakit denggi. -TVS
