SRI AMAN, 27 Julai: Mensia mayuh lebih agi ba sitak Sri Aman dilalau anang sengapa betunuka babas beduduk ari gaya hari ti kelalu angat jam ke diatu.
Tuai Opis Bomba enggau Penyah Penusah Malaysia (JBPM) Zon Tiga Sri Aman, Penguasa Bomba (PgB) Muhd Rais Adham Rosalan madah, kerejasama ari mensia mayuh chukup beguna dikena nyeliah penyadi enda disadang baka ke udah nyadi ba Jalai Kejatau Lingga 2019 suba.
“Aku ngelalau sereta nesau mensia mayuh lebih agi ke diau ba Sri Aman, Betong enggau Saratok anang sengapa betunuka babas.
“Ulah betunuka babas jam ke diatu ulih ngujungka angin kamah sereta ngeruga pengerai mensia mayuh nyema (api) enda alah jaga.
Iya mansutka penemu nya ngagai TVS sehari tu tadi bekaul enggau timbal penemu senentang gaya hari ke balat angat jam ke diatu.
Ku tandu iya, raban orang bumai mega dikearapka betanya dulu enggau raban bekaul baka bomba nyema deka nunu babas ungkup endur bekebun enggau nanam padi.
Iya madah, pekara nya betuju dikena ngemudahka pengawa matau dipejalaika raban bekaul.
Ke penerang, ba taun 2023 JBPM Zon 3 Sri Aman ke mungkur Balai Bomba Sri Aman, Betong enggau Saratok ngerikodka 77 iti kangau tasah.
Udah nya, naka bulan June taun tu tadi bisi semilan kangau ke sebaka dirikodka.-TVS
