KUCHING, 27 Julai: Kompeni penerebai bilun dipinta ngerintis baru jalai penerebai entara mengeri di Sarawak enggau indu nengeri baru Indonesia, Nusantara di Kalimantan Timur.
Konsul Jeneral Republik Indonesia di Sarawak Raden Sigit Witjaksono madahka, jalai penerebai bilun ke baru nya ulih muka peluang ekonomi ke besai entara Sarawak enggau Indonesia.
Ku iya madah, nyentuk ke diatu, jalai ari Sarawak ngagai Nusantara semina nengah jalai darat ti ngambi timpuh ke chukup lama.
“Sebedau tu, bisi penerebai bilun terus ari Kuching-Pontianak tang diatu udah diketuka sementara, kami ngarapka bisi penerebai bilun terus ari Kuching ke Balikpapan (padang bilun ke semak enggau Nusantara.
“Kami nerima peminta ti mayuh lalu sekeda ari mengeri Miri minta penerebai bilun ke Balikpapan. Tu ulih nambahka akses enggau penyambung entara Sarawak enggau Indonesia,” ku iya.
Iya madah munyi nya ngagai pemberita pengudah ngulu Pengerami Ngintu Indonesia Merdeka di Konsulat Jeneral Republik Indonesia ditu, sehari tu tadi. -TVS
