SPAOH, 27 Julai: Komiti Penyangga Penusah Nengeri Sarawak (JPNBS) deka baum enda lama agi berundingka atur ke patut digaga dikena napi gaya hari ti kelalu angat tauka musin kemarau jam ke diatu.
Chairman JPNBS Datuk Amar Douglas Uggah Embas aum nya diatur ngambika ulih ngerah atur ke patut digaga ungkup komiti ba renggat pelilih enggau bagi menua.
“Kitai deka baum enda lama agi dikena meri gerah ngagai semua komiti ba renggat pelilih enggau bagi menua dikena napi musin kemarau tu.
“Kebuah pia laban maya musin kemarau baka tu siti dua endur semampai bisi kena tuntung penusah angus.
“Kelimpah ari nya, genturung pendiau enggau rumah panjai mega deka napi penanggul suntuk ai irup.
“Nyadi semua komiti ba renggat bagi menua enggau pelilih dipinta bejejaga napi penanggul suntuk ai,” ku iya.
Uggah ke mega Sapit Premier Sarawak madah munyi nya pengudah Pengawa Nyuaka Setipikit Kus Nyulam Baju Dabong diatur ba Diwan Komuniti Spaoh sehari tu tadi.
Ku iya, mensia mayuh dilalau anang sengapa betunuka utai ke ulih ngujungka penyadi babas angus.
Udah nya, iya madah raban sida mega deka matau kandang endur ke suah dituntung penusah babas angus ngena dron enggau ke bukai ba sitak tumpuk angat lebih agi di Miri enggau Baram.
Bepelasarka penerang ke dipansutka Opis Bomba enggau Penyah Penusah Malaysia (JBPM) Sarawak,
Bisi 42 kes babas angus nyadi ba Sarawak dalam timpuh lima hari kenyau 22 nyentuk 26 Julai tu tadi ngaul kandang endur urung 23.166 hektar pemesai.
Zon Sibu pemadu tinggi kes iya nya 30.95 peratus ditangkan Miri (26.19 peratus), Kuching (16.66 peratus), Kota Samarahan (9.52 peratus) Sri Aman (7.14 peratus), Limbang (7.14 peratus) enggau Bintulu (2.38 peratus).-TVS
